Gin-athag sang pinuno sa Department of Social Services and Development (DSSD) sa syudad sang Bacolod nga ginpalab-ot na nila sadto pa sa Barangay Villamonte ang nahanungod sa mga grupo sang kabataan nga nagaliyong sa kagab-ihon.
Nahibaluan nga ang Bacolod City Government Center (BCGC) Grounds ang nahamtang sa nasambit nga barangay.
Madumduman nga nagluntad ang riot sang Domingo sa tunga sang grupo sang mga pamatan-on nga nagresulta sa pagkadula sang kabuhi sang isa ka 15 anyos nga sulterito matapos nga ini ang ginbuno.
Suno kay Pacita Tero, madamo na sila sang mga kabataan nga nagkaladakop sa nasambit nga Barangay sa paglapas sang curfew kag kalabanan sa mga ini ang residente sa Purok Malvar.
Ang mga pamatan-on ang masami masapwan nga nagalagaw sa market-market, mga kapihan kasubong man sa Bacolod Government Center (NGC) nga kaangay nga nagaserbe na nga plaza para sa mga ini.
Ang mga ginadakop nga kabataan ang indi naman mahunong sa Social Development Center (SDC) bangod ang mga ginabutang lang diri amo ang mga “Children in Conflict with the Law” ukon ang mga menor de edad nga nakakomiter sang krimen agud nga marehabilitate.
Samtang ang mga nagakadakop naman nga kabataan bangod sa curfew ang ginakabig nga mga “Children at Risk”.
Bangod indi mabutang sa SDC, ang mga nagakadakop sa paglapas sa curfew ang ginawarningan lamang.
Nagtugyan naman si Tero sa kada barangay sa syudad nga makatukod sang holding room kun sa diin igabutang ang mga kabataan tubtob mag-aga antes ipakuha sa ila nga mga ginikanan.
Masami suno diri nga nagakakibot nalang ang mga ginikanan nga sila ang ginapatawag.
Suno kay Tero, wala dapat ginapabay-an sang ginikanan ang ila mga kabataan nga maggwa sa kagab-ihon.
Panugyan man sini nga dapat matudluan sang disiplina ang mga kabataan kag maanad sa kun ano oras dapat yara na sa puluy-an.
Ang mga kabataan nga masami na madakpan sa kaangay nga bayolasyon, ukon pasulit-sulit, magahingyo na ang mga ini sang court order nga magapahanugot nga ang mga kabataan ang ikonsiderar nga Children in Conflict with the Law kag mahunong sa SDC.
Aminado si Tero nga ang natabo nga pagpamuno sa BCGC Ground ang mahimo resulta sang madugay na nga dumtanay.
Agud nga ini ang indi na maliwat, pasalig ni Tero nga ila ini pagapungkuan agud makahuman sang nagakaigo nga human intervention plan.
