Ginpahanumdom sang tagpamaba sang Department of Social Welfare and Development Regional Office 6 nga may kaso kriminal nga pangatubangon ang sin-o man nga magarepack sang mga nakabox nga assistance nga ginahatag sang ahensya sa mga pumuluyo nga apektado sang kahalitan nga dala sang Hangin Habagat nga ginpabaskog sang Bagyo Goring.
Sa interview sang Bombo Radyo Bacolod kay Atty. May Rago Castillo, gin-athag sini nga indi lang sa Iloilo naghatag sang ayuda ang DSWD Region 6 kasubong man sa mga naapektuhan nga mga local government units (LGUs) sa Western Visayas.
Apang ang ginahatag nga foodpacks ang nakadepende sa ginasumiter sang Municipal ukon City Disaster Risk Reduction and Management Council (DRRMCs) nga listahan sang mga apektado nga panimalay.
Pahanumdom ni Castillo nga ang mga gindeklarar nga apektado lamang amo ang makabatun sang family foodpacks.
Ini ang naga-unod sang anom ka kilo nga bugas, apat ka tuna, apat ka corned beef, duha ka sardinas, lima ka sachet sang kape, kag lima ka sachet sang cereals nga sarang mapaigo sang lima tubtob anom ka katapo sang isa ka pamilya sa sulod sang duha tubtob tatlo ka adlaw.
Paathag sini nga wala na nagapagwa sang food assistance ang DSWD nga nakaplastic, kundi ini ang yara sa boxes agud maseguro nga silyado ang mga pagkaon partikular na ang bugas.
Pahayag ni Castillo nga ginaderetso na nila sa tagsa ka LGU ang mga foodpacks kag ang mga ini na ang may obligasyon kag responsibilidad sa pagpalab-ot sa mga apektado nga pumuluyo.
Wala naman nagkomintar si Castillo natuhoy sa issue sa Barangay Palaka, sa banwa sang Valladolid kun sa diin ginparepack sang Punong Barangay ang 250 ka mga boxes sang family food packs agud mahatagan ang kabug-usan nga isa ka libo nga pamilya sa ila Barangay.
Apang panindugan ni Castillo, nga ang kadamuon sang unod sang family foodpacks ang supisyente gid para sa isa ka pamilya kag santo sa isa ka provision sang Republic Act 10121 ukon DRRM Act, indi pwede nga irepack ang mga goods gikan sa orihinal nga DSWD package kag ang pagbayolar diri ang magapangatubang sang criminal offense.
Paandam ni Castillo nga sa tion nga may matumod nga kaangay nga bayolasyon, ang DSWD mismo ang magafacilitate sa pagfile sang kaso.
