Nag-apelar sang dugang nga ayuda si Bacolod City Lone District Congressman Greg Gasataya sa Department of Social Welfare and Development bangod tubtob sa Setyembre 30 pa ang modified enhanced community quarantine (MECQ) sa Bacolod.
Magluwas sa paghingyo sini kay DSWD Secretary Rolando Bautista, nag-apelar man ini sa ginpatigayon nga Budget Meeting sa House Committee on Appropriations bangod nagapati ini nga mas maayo kun mahatagan sang dugang pa nga ayuda ang mga apektado sang pagpaidalum sa MECQ sang ciudad.
Nagpasalig naman si Bautista nga magapadayun ang pagbulig sa Bacolod.
Nahibaluan nga P165 billion ang gin-alokar para sa kampanya batok sa COVID-19 pinaagi sa Bayanihan to Recover as One Act ukon ang Bayanihan 2.
Suno kay Gasataya, daku nga porsyento sa mga pumuluyo sang syudad ang apektado sang sitwasyon.
Nagapangabay ini nga tun-an sang DSWD ang sitwasyon sang Bacolod agud nga mabuligan kag mahatagan sang nagakaigo nga financial assistance ang nagakinahanglan.
