Magapanagtag bwas ang Department of Social Welfare and Development sang ayuda sa indigent students sa idalom sang Assistance to Individuals in Crisis Situations Educational Assistance sang ahensya.
Ang distribution ang patigayunon kada Sabado kag santo sa announcement sang DSWD, ini ang patigayunon tubtub sa Setyembre 24.
Suno kay Pacita Tero, pinuno sang Department of Social Services and Development, madayon ang tagtaganay bwas sa Ayala Capitol Central, sugod alas-9:00 bwas sa aga.
Suno diri, luyag ni Secretary Erwin Tulfo nga patigayunon ang pay-out sa satellite office apang gamay ang space sang opisina diri sa Bacolod gani nagpangita sila sang mas maligwa.
Sa idalom sang programa, P1,000 ang mabaton sang indigent nga estudyante sa elementary, P2,000 naman sa high school students, P3,000 sa senior high school students kag P4,000 naman sa college students ukon sa mga vocational courses.
Suno kay Tero, wala sang limit sa numero sang magabaton sang ayuda kundi makabaton ang kutob sang sin-o nga magakadto.
Sa assessment table, pagalantawon ang ila dala nga requirements nga certificate of registration ukon enrollement kag valid ID sang parent ukon guardian kag sang estudyante.
Ang makabaton sang ayuda amo ang mga breadwinner, bata sang solo parents, PWD, OFW, may HIV, working student, biktima sang pagpang-abuso ukon kalamidad, wala sang trabaho ang ginikanan bangud sila ang ginakabig nga student in crisis.
Nagpanawagan naman ini sa mga pamilya nga may ikasarang nga indi na magpila kundi ihatag na ini sa mga matuod nga indigent.
