BACOLOD CITY-Gin-athag sang tagpamaba sang Department of Social Welfare and Development (DSWD) Region 6 nga wala nagakahulugan nga kun nag-register ang isa ka persona sa Relief Agad app, mangin benepisyaryo na ini dayon sang Social Amelioration Program.
Ini ang kasunod sang text blast sang National Telecommunications Commission (NTC) nga nagasiling nga ang mga SAP beneficiaries ang mahimo makaregister sang ila nga Social Amelioration Card (SAC) forms sa link nga www.ReliefAgad.ph humalin Hunyo 12 tubtob 16.
Sa interview sang Bombo Radyo Bacolod kay DSWD-6 spokesperson May Rago-Castillo, ginpahayag sini nga ang mga lang na-encode nga mga additional families sang ila mga local government unit ang sarang makagamit sang amo nga link agud mag-register.
Dugang pa sini, ipaidalom sa gihapon sa duplicity check ang mga nagregister sa link agud masiguro nga lehitimo kag kwalipikado ini nga benepisyaryo.
Suno pa kay Castillo, halos tapos na sa encoding sang social amelioration cards ang Western Visayas.
Panugyan sini sa mga additional families nga ivalidate sa ila tagsa ka LGUs kun na-encode na ang ila pangalan ukon wala.
Ginkumpirmar naman ni Castillo nga ila ginatinguhaan nga matapos na ang payout sa mga SAP beneficiaries sa Hunyo 24.
