Gin-athag sang regional director sang Department of Social Welfare and Development-Negros Island Region nga indi kinahanglan nga personal nga magkadto ang mga pumuluyo sa releasing sang financial assistance kun indi na masarangan pyshically.
Ini kasunod sang nalapta nga social media post nga ginatuwangan ang isa ka tigulang agud nga madala sa opisina sang DSWD-Binalbagan agud masiguro nga isa ini sa beneficiaries.
Sa interview sang Bombo Radyo Bacolod kay DSWD NIR Director Erwin Razo, indi na kinahanglan magkadto sa releasing area kun indi masarangan sang beneficiaries kaangay sang mga senior citizens, bangud ang mga may ikasarang nga family member kaangay sang bata ang mahimo man ang magbaton sang ayuda.
Suno kay Razo, ang Presidente ang nagmando sa social workers nga indi na pabudlayan pa ang mga pumuluyo, gani ang mga social workers ang mismo nagapadulong sa balay sang mga beneficiaries kun kinahanglan.
Dugang pa sini nga wala pa sang schedule sa releasing sang UPLIFT sa banwa sang Binalbagan bangud ang releasing sang nasambit nga ayuda ang natalana pa sa Agosto 18.
Gin-athag man sang congressman sang 5th District sang Negros Occidental nga ang mga bedridden ang ginakadtuan nalang sa ila puluy-an agud nga ihatag ang ayuda.
Ini kasunod sang naglapta sa social media nga post nga ginatuwangan ang isa ka tigulang agud nga madala sa opisina sang DSWD sa Binalbagan agud masiguro nga isa ini sa beneficiaries.
Sa interview sang Bombo Radyo Bacolod kay Negros Occidental Representative Dino Yulo, ang pagpanaog sang pamilya sang 77 anyos nga si Cresenciano Paculanang paagi sa pagtuwang-tuwang sa iya ang indi para sa orientation kundi para masiguro nga yara ang pangalan sini sa makakuha sang ayuda.
Suno kay Yulo, ang isa lang ka paagi nga mahimo kag ini amo ang makapanaog sila kag makakadto sa opisina sang DSWD.
Suno pa diri, sa pagpaathag sang apo, gindala man sang pamilya ang senior citizen agud nga kun kinahanglan nga i-identify ara na nga daan ini.
Ginpahayag man sang kongresista nga luyag niya nga masolbar ang kaangay nga problema bangud dako man nga bagay sa mga pumuluyo nga may bulanan nga makuha nga ayuda.
