Ginpahanumdom sang director sang Department of Social Welfare and Development – Negros Island Region (DSWD-NIR) nga sa guidelines sang ahensya para sa aid distribution, kun ano ang nakabutang nga batunon sang benepisyaryo amo gid ang dapat nila nga mapauli.
Ini kasunod sang nagtuhaw nga isyu sa banwa sang Valladolid kun sa diin ginbawi ang P3,000 gikan sa P5,000 nga cash assistance.
Sa interview sang Bombo Radyo Bacolod kay Erwin Razo, dapat matumod kun sa diin gid natabo ang pagbuhin sang ayuda.
Nagapati ini nga indi sa tion sang aid distribution natabo ang pagbuhin bangod yara sa guidelines nga ang DSWD Personnel ang dapat magpahanumdom sa mga kliyente nga kun ano ang yara sa listahan nga balor amo gid ang ila nga mabatun.
Paathag sini nga ang DSWD ang wala nagadownload sang pondo sa local government units, sa baylo ang mga DSWD personnel mismo ang nagapatigayon sang payout sa location nga iset sang LGU.
Ginapahanumdom man sini sa mga benepisyaryo nga kun ano ang makita nila nga balor nga mabatun sa dokumento nga ila pirmahan, amo gid ang dapat nila nga mabatun kag indi dapat buhinan.
Suno diri, ginavalidate sang social workers ang sitwasyon sang mga benepisyaryo kag diri man nakabasi kun pila ang ihatag nga financial assistance.
Kun may ara sang mga complaints, ini ang dapat nga ifile sa mga nagakaigo nga ahensya kaangay sang Office of the Ombudsman kag icopy furnish sa ila agud nga may-ara man sila sang basihan sa pagpatigayon naman sang kaugalingon nga imbestigasyon.
Nahibaluan nga sa mga alegasyon, matapos mabatun sang mga benepisyaryo sa Valladolid ang P5,000 sila ang ginakadtuan sang empleyado sang Valladolid Municipal Government agud bawion ang P3,000 sa rasun nga ipanagtag pa sa iban nga benepisyaryo.
