Preparado na ang Department of Social Welfare and Development (DSWD) nga magpadala sang ayuda sa mga komunidad nga posible nga maapektuhan sang ginalauman nga pagsulod sang Super Typhoon Champi sa Philippine Area of Responsibility (PAR) subong nga semana.
Suno sa DSWD, may yara sang 4,571,390 family food packs nga nakatago sa mga relief warehouse sini sa bug-os nga pungsod.
Magluwas sini may yara man sang nakatago nga 344,942 non-food items kag 204,745 ready-to-eat food packs nga mahimo ipanagtag sa nga nagakinahanglan.
Ginpahayag ni DSWD Assistant Secretary Irene Dumlao nga padayon nga ginapabilin nga aktibo ang suplay sang mga nagapanguna nga kinahanglanon paagi sa mga strategic hub kag warehouse sang ahensya agud nga madasig nga madul-ong ang dugang nga bulig sa mga komunidad nga kinahanglan sini.
Padayon man ang produksyon sang mga family food pack sa mga nagapanguna nga production hub sang ahensya bilang kabahin sang ginpasanyog nga preparasyon sa posible nga epekto sang bagyo.
Suno sa DSWD, ang mga tikang ang kasunod sa direktiba sang Presidente nga siguruhon nga nagakaigo ang nakatago nga supply sang mga nagapanguna nga kinahanglanon kag madasig nga mapanagtag ang relief assistance sa tion sang kalamidad.
Padayon naman nga ginasundan sang ahensya ang mga report sang Philippine Atmospheric, Geophysical, and Astronomical Services Administration (PAGASA) kaangot sang hulag sang Champi, nga ginalauman nga mahimo nga makaapekto sa Northern Luzon, Cagayan Valley kag naaminhan nga bahin sang Ilocos Region sa katupusan sang semana.
