Nakahanda ang Department of Social Welfare and Development Region 6 nga mag-implementar sang programa sang national government nga nagatuyo nga maghatag sang P200 nga monthly financial assistance sa pigado nga mga pamilya kada bulan bangud sa pagsaka sang presyo sang produktong petrolyo.
Nahibaluan nga kahapon, gin-aprubahan ni Presidente Rodrigo Duterte ang rekomendasyon sang Department of Finance nga indi pag-isuspend ang excise tax sa produktong petrolyo apang 12 milyones ka poor households ang magabaton sang P200 nga ayuda kada bulan sa bilog nga tuig.
Sa interview sang Bombo Radyo kay May Rago-Castillo, public information officer sang DSWD Region 6, nagahulat pa sila sang instructions kag guidelines nagikan sa central office angot sa ayuda.
Kaangay sang kinaandan nga distribution sang ayuda, nagagamit ang DSWD sang Listahanan database agud nga matumod ang pigado nga pamilya kag sila ang masami nga ginahatagan sang prayoridad.
Ang kadugayon sang distribution ang nagadepende naman sa programa, suno kay Castillo.
Sang ginpatuman ang Social Amelioration Program sang nagsugod ang COVID pandemic suno kay Castillo, gintugyan sang DSWD sa local government unit ang pagtumod sang mga benepisyaryo kag naglabay man sa screening sang ahensya.
Ang kalawigon sang proseso suno sa iya ang magasugod sa pagdownload sang pondo sa local government unit tubtub sa distribution.
