Nagpanugyan ang Department of Social Welfare and Development Region 6 sa indigent students kag sa ila mga ginikanan nga indi magpadulong sa payout site sugod sa Sabado kun wala nakaparehistro online agud nga mag-avail sang educational assistance nga ginahatag sang ahensya.
Suno kay DSWD Region 6 spokesperson Atty. May Rago-Castillo, identified na ang mga clients nga mabaton sang ayuda sa Sabado gani indi magkadto sa payout site kun indi makabaton sang text message agud indi mag-uyang sang tiempo kag pamasahe.
Suno kay Castillo, unahon naman ang nagkadto sa payout site sang Sabado kag nagpauli nga wala nakabaton sang ayuda bangud nakuha na sang DSWD personnel ang ila nga contact number.
Agud nga makaparehistro online, magbisita lang sa Facebook page sang DSWD Western Visayas bangud diri nabutang ang link nga kadtuan agud nga makaparehistro.
Suno diri, mapabulig lang sa mga nakahibalo maggamit sang internet kun indi makahibalo magparehistro online.
Nagpanugyan si Castillo sa mga nagaplano mag-apply para sa medical assistance kag burial assistance nga indi na magkadto sa payout sites bangud indi sila maakomodar.
Sa mga indi makahibalo magparehistro online, magpatudlo lang sa mga kakilala nga nakahibalo maggamit sang internet agud nga makaparehistro sang temprano kag makabaton sang advisory.
