Ginkumpirmar sang spokesperson sang Department of Social Welfare and Development (DSWD)-Regional Office 6 nga nabaton na nila ang guidelines para ipanagtag nga financial assistance para sa mga apektado nga rice retailers sa ginpatuman nga price ceiling kasunod sang ginpagwa sang presidente nga executive order.
Sa interview sang Bombo Radyo Bacolod kay Atty. May Rago-Castillo, gintawag ang programa sang financial assistance amo sustainable livelihood program economic relief subsidy kun sa diin pagahatagan ang mga magagmay ukon micro rice retailers sang P15,000 one time subsidy.
Suno kay Castillo, ini ang bulig sa mga magagmay nga rice retailers sa epekto sang ginpatuman nga Executive Order No. 39 ukon price ceiling sa bugas.
Suno diri, plano nga mabayaran ang 250 rice retailers sa bug-os nga Western Visayas kag nakahanda na ang DSWD sa pay-out.
Ang amount sang ayuda nga igahatag sa 250 micro rice retailers ang nagdangat sa P3.75 million.
Ang pagtumod sang mga beneficiaries ang ginpatigayon sang Department of Trade and Industry kag ang nasambit nga ahensya ang magahatag sang listahan kag ang DSWD na ang mapatigayon sang pay out.
Suno kay Castillo nabaton nila ang pagsulundan para sa financial assistance para sa micro rice retailers nga naapektuhan sa ginpatuman nga price cap sang Biyernes.
Samtang, sang week-end ginpreparar na ang pondo para sa releasing sang ayuda kag per province ang patigayunon nga pagtagtaganay kun sa diin may mga staff ang ahensya nga magpatuman sang programa.
