Ginpasalig sang tagpamaba sang Department of Social Welfare and Development Regional Office 6 nga sila ang nakahanda nga magpatuman sang mandu para sa paghatag sang subsidy sa mga magagmay nga rice retailers nga maapektuhan sang price ceiling sa regular kag well-milled rice.
Madumduman nga sa pagpatuman sang Executive Order No. 39 ukon ang pagdagdag sang price ceiling nga P41 para sa kada kilo sang regular milled ruce kag P45 sa well-milled rice, kadungan man nga nag-ibwal ang mga rice retailers sa panindugan nga sila ang mamierdihan.
Ini sa rasun nga ang ila mga stocks sang bugas ang nabakal sa mas mahal nga presyo kun ipaanggid sa gindagdag nga price ceiling.
Sa interview sang Bombo Radyo Bacolod kay Atty. May Rago Castillo, willing gid sila kag nakahanda nga magtuman sa executive order nga gin-aprubahan ni President Ferdinand “Bongbong” Marcos Jr., nga amo man ang Department of Agriculture Secretary.
Apang sa karun, nagahulat pa sila sang ipanaog nga guidelines, kag kun ini ang ila na nga mabatun gilayon naman nga patigayuhon ang paghatag sang ayuda sa mga rice retailers.
Paathag ni Castillo, nga ang Implementing Rules and Regulations (IRR) ang magagikan sa DSWD Central Office.
Suno diri, ang DSWD ang nagakinahanglan sang guidelines bangod sila ang may nanarisari nga assistance programs kaangay sang Sustainable Livelihood Program kag Assistance to Individual in Crisis Situation (AICS).
Pasalig ni Castillo nga sila ang magakooperar sa mga partner government agencies kaangay sang Department of Agriculture, Department of Trade and Industry (DTI) kag local government units (LGUs) nga amo ang maga-identify sang mga recepients.
