Nagpatigayon sang press conference ang Provincial Government sang Negros Oriental sa Canlaon City upod kay Department of Social Welfare and Development (DSWD) Secretary Rex Gatchalian may kaangtanan sa paglupok sang Bulkan Kanlaon.
Sa mensahe ni Gatchalian, may ara na sang food system kun sa diin ang DSWD ang magaprovide sang family food packs kag ini ang ipanagtag sang Provincial Government kag mga banwa ukon ciudad.
Paathag sini nga masami ginapahanumdom ni President Ferdinand “Bongbong” Marcos Jr. nga mag-go beyond sa pagbulig partikular na sa mga kalamidad kag krisis.
Ini man ang rasun kun ngaa may-ara sang Assistance to Individuals in Crisis Situation (AICS), Tulong Panghanapbuhay sa Ating Disadvantaged/Displaced workers (TUPAD) kag iban pa nga emergency cash transfer program.
Panindugan sini nga ang Presidente ang may mandato sa tanan nga ahensya sang gabinete nga magbulig sa response kag recovery sa mga disasters kaangay sang paglupok sang Bulkan Kanlaon.
Ang DSWD ang nagamonitor man sa sitwasyon kag nagapakig-angot sa mga apektado nga mga ciudad kag banwa agud maseguro kun ano ang mga panginahanglanon kag ini ang mahatag.
