Ginpasalig sang Department of Trade and Industry nga ila monitoron ang presyuhanay ssang face shield sa Bacolod kag Negros Occidental.
Ini ang kasunod sang pagtalana sang Department of Health sang suggested retail price sa face shield nga P26 tubtob P50.
Apang mapahanugutan gihapon ang dugang nga 10 porsyento sa presyo ukon P55 sa mga lugar sa bahin sang Visayas kag Mindanao bangod sa distribution cost kaangay sang transport ukon delivery fee.
Suno kay DTI Negros Occidental head Rachel Nufable, ang SRP ang para sa mga ordinary grade nga mga faceshield santo sa preskripsyon sang Department of Health (DOH).
Madumduman nga nag-anunsyar ang Department of Transportation (DOTr) nga sumugod Agosto 15, kinahanglan na nga magsuksok sang faceshield ang tanan nga mga sumalakay sa public transportation.
Samtang sang Lunes, Agosto 10, nagpagwa naman sang memorandum ang DOH natuhoy SRP nga igapatuman sa mga emergency essential medicines kag medical devices.
Ang faceshield ang isa sa ginakabig nga medical devices.
Bangod naman sa nanari-sari nga sahi sang faceshield sa merkado, ginatan-aw nga magapagwa sang SRP ang DOH para naman sa medical grade nga mga faceshield.
Ginapaathag naman ni Nufable nga nakahanda ang DTI nga magbulig sa DOH nahanungod sa mga pagpatuman.
Ginapanugyan naman nga ang dapat nga baklon nga faceshield amo ang transparent.
Samtang ginatan-aw naman nga bangod sa pagka-creative sang mga Pilipino, madamo pa sang mga Do It Yourself (DIY) nga mga faceshield ang sarang nga mahimo.
