Nagahulat pa sang Department of Trade and Industry ang Implementing Rules and Regulations (IRR) antes ma-implementar ang Executive Order No. 39 nga nagatalana sang price ceiling para sa bugas.
Madumduman nga gin-aprubahan ni President Ferdinand “Bongbong” Marcos Jr. ang P41 nga price ceiling para sa kada kilo sang regular milled rice kag P45 sa kada kilo sang well-milled rice.
Kahapon sa paglibot sang Bombo News Team sa pila ka mga merkado sa syudad sang Bacolod, pipila lamang ang nakitaan sang presyo nga P45, kag kalabanan ang wala gihapon nagasapak sa mandu nga price ceiling.
Panindugan sang mga rice retailers nga mahal nila nabakal ang ila bugas gikan sa mga rice traders kag sila ang mamierdihan kun ini ang ibaligya santo sa price ceiling samtang kun ipilit ang nasambitan nga presyo, madamo sa mga ini ang pilion na lamang nga magsarado kag konsumuhon ang nasambitan nga supply sang bugas.
Sa interview sang Bombo Radyo Bacolod kay Dr. Frances Mae Llamas, ang Economic Development and Investment Promotion Consultant sa Bacolod City, ang IRR amo ang pagabasehan sang DTI sa pagpatuman sang price ceiling.
Paathag sini nga sa karun Suggested Retail Price (SRP) lamang ang magamit nga rasun sang DTI sa pagmonitor sang mga establishimento.
Una naman nga naghuman sang Price Monitoring Council ang Bacolod City Government.
Suno kay Llamas, wala pa nakapakig-angot ang DTI sa Bacolod City Government natuhoy sa implementasyon sang price ceiling sa bugas.
Pasalig naman sang mga ini nga sa tion nga magahulag na ang DTI, ang syudad ang nakahanda man nga magkooperar.
