Ginpasalig sang Department of Trade and Industry (DTI) nga may bastante nga supply ang pungsod sang mga kinahanglanon kag nagapanguna nga mga balaklon, gani wala sang rason nga mag-panic buy ukon mag-hoard sang madamo nga mga produkto.
Suno kay Trade Secretary Maria Cristina Aldeguer-Roque, bastante na ang supply sang basic necessities kag prime commodities agud masabat ang kinahanglanon sang publiko, ilabi na subong nga nagahilapit na ang holiday season.
Ginpasalig man ni Roque nga magapabilin nga wala sang pagbag-o ang presyo sang 190 ka mga basic necessities tubtub sa Disyembre 31, 2026, sandig sa kasugtanan sang mga manufacturers.
Kalakip sa mga produkto nga ginasakop amo ang sardinas, gatas, kape, tinapay, instant noodles, bottled water, detergent, laundry soap kag iban pa nga kinahanglanon.
Padayon man nga gina-monitor sang DTI ang presyo sang amo nga mga produkto agud masiguro nga ginasunod ang price commitment kag indi mabuhinan ang kaundan ukon kadakuon sini… Ginpanugyanan ang publiko nga magbakal lamang sang bastante para sa ila kinahanglanon agud malikawan ang indi kinahanglan nga pagtipon sang mga produkto.
