Naghatag sang mga pahanumdom ang Department of Trade and Industry – Negros Occidental sa mga dapat tandaan sa pagbakal sang Christmas lights.
Sa interview sang Bombo Radyo Bacolod kay Reginald Hudierez, senior trrade and industry development specialist sang DTI-Negros Occidental, agud maseguro nga indi substandard ang christmas lights nga mabakal, dapat tsekyaron kun may nagakaigo nga tatak.
Kalakip diri ang Philippine Standard (PS) License kag Import Commodity Clearance (ICC).
Suno kay Hudierez, sa ila nga pagtsekyar halos tanan nga mga produkto sa merkado ang compliant man sa requirements.
Sa ICC, ginatsekyar ang shipments sang mga produkto kun sa diin may ginatest nga sample sa laboratory kag inkaso nga indi makapasar, mahimo ang bilog nga delivery ang pabalikon sa point of origin.
Samtang mas mataas naman nga standard ang PS License bangod ang DTI ang nagapadala mismo sang product auditors sa mga planta kalakip na ang yara sa abroad partikular na sa China kun sa diin gikan ang kadam-an nga christmas light products.
Wala naman nalakip sa ila monitoring ang prices bangod indi man kabahin sa basic commodities ang christmas lights.
Pahanumdom na lamang ni Hudierez sa mga users ang husto nga pag-usar kag lantawon ang mga precautionary measures nga nakapagkit sa packaging kag instructions.
Kaangay lamang sang mga christmas lights nga para lamang sa indoor, nga indi gid dapat iplastar sa gwa sang balay.
Ginapanugyan man ang pag-unplug sang mga christmas lights sa tion nga magtulog agud mapanubo ang tyansa sa pagluntad sang sunog.
