Dugang nga 13 ka mga centenarians sa Negros Occidental ang nahatagan sang provincial government sang P100,000 cash kag certificate.
Sa ginpatigayon nga press conference, ginpahayag ni Negros Occidental Governor Eugenio Jose “Bong” Lacson nga sa kinaandan sa tion sang Cinco de Nobyembre sila nagahatag sang P100, 000 kag certificate para sa centenarians apang wala nagselebrar subong nga tuig bangud sa pandemya kag indi man ini maayo nga ipostpone man ang programa para sa centenarians gani nagdesisyon sila nga idoor to door ang pagpanghatag.
Natapos na ang norte nga bahin sang probinsya gani gin-umpisahan naman ang paghatag sa syudad sang Bago, Himamaylan, kag Kabankalan, kag ang banwa sang Hinigaran kag Ilog.
Ginpasalamatan sang gobernador ang mga benepisyaryo kag pamilya nila kasubong man ang local officials sang mainit nga pagbaton sang government officials sa ila banwa kag panimalay.
Nalipay man ini nga makita ang Negrense nga nagdangat sa 100 years old nga nagapabilin nga maayo ang lawas bangud ang life expectancy sa bilog nga kalibutan ang masami nga manubo sa 100 years.
