May dugang pa nga mga opisyales sang barangay sa ciudad sang Bacolod nga natalana nga kasuhan sang Criminal Investigation and Detection Group (CIDG) may kaangtanan sa anomaliya sa tagtaganay sang 1st tranche sang social amelioration program (SAP) cash assistance.
Sa interview sang Bombo Radyo kay Police Chief Master Sergeant Ramiro Gocotano, madamo na nga opisyales sang pito ka barangay sa ciudad ang nakasuhan sa Bacolod City Prosecutor’s Office.
Ini ang ginalakipan sang punong barangay sang Brgy. 19, Brgy. Felisa, Brgy. Alangilan, Brgy. Mandalagan, Brgy. Mansilingan kag Brgy. 35.
Magluwas sa punong barangay, nakasuhan man ang pila ka barangay kagawad, staff kag pribado nga indibidwal.
Samtang, napasakaan naman sang kaso ang purok president sang Brgy. Banago.
Suno kay Gocotano, magluwas sa punong barangay sang Brgy. Felisa, napasakaan man sang kaso ang pila ka mga barangay kagawad.
Suno diri, may yara pa sang isa ka barangay nga ila man ginaproseso nga pasakaan sang kaso kag may duha nga under validation.
Gin-athag man sini nga ila maid-id nga ginasala ang mga nagareklamo nga mga pumuluyo bangud ila man ginalantaw kun posible nga nagapamulitika lang ang mga ini.
Nag-abiso man ini sa mga residente nga indi magpadangat sang reklamo sa CIDG kun indi man matuod-tuod ang alegasyon kag pamulitika lang ang tuyo.
Nagpanawagan man ang pinuno sa mga opisyales sang barangay kun ihatag sa mga pumuluyo ang nagakadapat nga bulig nagikan sa gobyerno kag indi na maghingalit pa ilabi na nga may ginapangatubang sa karun nga pandemic.
