Pila ka mga fast craft vessel ang nagbalik na sa byahe sa ruta nga Bacolod-Iloilo vice versa sumugod kahapon makaligad sang lima ka bulan nga pag-untat sang operasyon bangod sa COVID-19 pandemic.
Suno kay Frank Carbon, consultant on Operation sa Weesam Express, alas-8:10 sang aga ang ila nga byahe gikan sa Bacolod City samtang ang pabalik naman sa Bacolod gikan sa Iloilo City ang nakaschedule ala-1:10 sang hapon.
Paathag ni Carbon nga sa sulod sang isa ka semana, magapabilin nga isa lang ka round trip ang ila nga byahe sa nasambit nga mga schedule bangod ila pa nga ginatun-an ang sitwasyon kag kun ano ka damo ang pasahero.
Pasalig naman sini nga magluwas sa ila, may isa pa ka fast craft nga nag-operar naman gani duha na ka shipping lines ang nagabyahe sa karun.
Bangod sa posibilidad nga madamo sang tawo ang magapadulong sa pier, pahanumdom sini sa mga byahero nga dapat nakasuksok ang mga ini sang facemask.
Ginarekomendar man nila ang pagsuksok sang faceshield sa sulod sang fast craft vessel.
Dugang pa ni Carbon nga dapat hugot man nga bantayan ang 1-meter distace sang mga pasahero ilabi na nga mabaskog ang hangin sa tunga sang lawod kag mas dako ang risgo sa paglupad sang mga droplets nga mahimo makapalapta sang virus.
Pahanumdom sang negosyante nga nagapabilin gihapon sa palibot ang virus gani dapat man nga proteksyunan sang kada-isa ang kaugalingon.
Apisar nga apat-tubtob lima ka bulan nga nauntat ang byahe sang mga fast craft, pasalig ni Carbon nga wala sila nagpasaka sang plete sa mga pasahero kasubong man sa mga bagahe.
Ginakasubo naman sang negosyante nga indi pa makabalik sa normal nga pagbyahe ang mga fast craft vessels nga sa madumduman nagadangat sa 19 ka trips sa isa ka adlaw ukon halos kada oras antes paman ang pagluntad sang COVID-19 pandemic.
