Nakutkutan ang pila ka mga armas, bala kag gina-alegar nga mga improvised explosive devices sa sugar mill compound nga gina panag-iyahan ni former Negros Oriental Governor Pryde Henry Teves sa banwa sang Sta. Catalina, Negros Oriental.
Suno sa Criminal Investigation and Detection Group (CIDG), ila gin-kutkot ang bakante nga lote sa sulod sang 50-hectare compound.
Ginalantaw sang CIDG nga anggulo sang terorismo bangud sa possession sang explosives.
Suno sa Philippine National Police (PNP), ang mga nakumpiskar nga armas, live ammunitions kag fired bullets ang ipaidalum sa cross-matching kag ballistics examinations kun ini bala amo ang mga armas nga gingamit sa pagpatay kay Negros Oriental Governor Roel Degamo kag walo ka iban pa.
Gin-alegar sang isa ka witness nga si Teves ang nagsugo nga ilubong ang mga firearms.
Nakumpiskar ang mga ebidensya kag gamit sa area nga ginapanag-iyahan ni Henry Teves bilang presidente sang HDJ Tolong Corporation, gani siya ang gamiton bilang respondent.
Samtang, ang mga na-aresto nga sanday Nigel Lagunay Electona, Chief Security; Jeson Baillo Timtim, Security Guard; kag Dionilo Estoconing Mayagma Jr., Firetruck Driver nga nagatrabaho sa HDJ Agri-ventures Corp ang gindala na sa Manila kahapon sang hapon.
