Magadeploy na sang dugang nga mga kapulisan sa kada voter’s registration area ang Bacolod City Police Office (BCPO).
Suno kay P/Col. Ariel Pico, pinuno sa Mobile Patrol Unit, siya ang ginbutang agud magsupervise sa mga kapulisan nga gindeploy sa voter’s election registration.
Ini ang ginplastar kasunod sang natabo kahapon kun sa diin nagdugok kag nagtuga sang stampede ang pila sa Ayala mall matapos nga gindumilian sa pag-facilitate ang mga kapulisan, task force disiplina kag city legal offices.
Aminado man si Pico nga karun lang natabo sa maragtas sang Bacolod nga tuman ka damo ang nagapila para sa eleksyon kag indi manigar nga madamo diri ang nagtransfer gikan sa Negros Occidental.
Ini naman sini luyag nga masulit ang kaangay nga hitabo sa Ayala Mall, gani panigyan ni Pico nga pahanugutan ang mga kapulisan sa pagtuman sa ila nga mga trabaho.
Paathag man sini nga may nauna na nga koordinasyon ang syudad sa management sang mall gani natingala man ang mga ini sa hinali nga pagpugong sa ila.
Dugang pa ni Pico nga santo sa kasugtanan sang Bacolod City Government kag management sang Mall, ang mga kapulisan, city legal office personnel kag task force disiplina amo ang magafacilitate sa pagpapila sang mga botante samtang magabulig lang sa ila ang personnel sang mall.
Suno kay Pico, simply lang kuntani ang pagpatuman apang nagabudlay lang ini bangod sa tuman ka damo nga nagaparehistro.
Pasalig naman sini nga peace and order lang ang tinutuyo sang mga ginadeploy nga kapulisan.
Ginpakigbahin man sini nga nagdeploy naman sang 20 ka mga personnel ang Mobile Patrol Unit.
Ginabanta yara na sa 40 nga mga kapulisan ang gindeploy sa satellite registration sa Robinson’s Mall Mandalagan kalakip na ang gikan sa Bacolod Police Station 3 kag sa City Legal Office.
Ini agud nga maseguro ang kahilwayan sa linya ilabi na nga ginbantayan lang sang mga nagaparehistro ang alas-4:00 sang kaagahon kag gulpyada nga nagaguluha kun sa diin kun dyutay lang ang kapulisan mahimo nga indi nila makontrolar.
Suno kay Pico, ang satellite registration sa Robinson’s Mall Mandalagan ang tubtob pa sa Biyernes kag kasunod naman ini nga buhaton sa University of St. La Salle.
Pahanumdom sini sa nagapila nga magdala sang tubig kag makaon agud indi magutman sa pila kag indi man magdala sang bata.
Dugang pa sini nga kumpletuhon na ang requirements sa pagpadulong sa registration site kag kun makita nga indi na madala sa 350 nga ginarehistro, amat amat nalang nga magpauli.
