Gin-abisuhan na sang pinuno sang Provincial Disaster Management Program Division (PDMPD) ang mga local government units sa Negros Occidental nga may yara sang magaabot nga mga Locally Stranded Individuals (LSI) sa probinsya nagikan sa Manila.
Sa interview sang Bombo Radyo Bacolod kay Dr. Zeaphard Gerhart Caelian, ginpahayag sini nga ginpahibalo na sila sang Regional Inter-Agency Task Force (IATF) nga may yara sang mapauli nga mga LSI.
Magadepart sa Manila ang barko sang 2GO buas, Hulyo 26, kag ginabanta nga magaabot sa probinsya sa Lunes, Hulyo 27.
Ginalauman nga 131 ang magaabot apang wala pa ini mapat-od kun ini lamang ang ginalauman bangud wala pa sila sang nabaton nga final manifesto sang mga magapauli nga LSI.
Ang pagpauli sang mga ini ang paagi sa tulong initiative sang national government.
Gina-amat amat naman nila pagwa ang mga negative result sang mga swab test agud madecongest ang mga quarantine centers.
Ang magaabot sa Lunes ang ibutang sa Silay City Provincial Healing Center kag sa quarantine center sang LGU.
Samtang ang mga magikan sa Cebu ang ibutang sa Cadiz City quarantine center.
Agud masiguro nga wala sang makalusot nga positibo, ginaswab sang probinsya ang tanan nga nagapauli.
Ginaswab sang probinsya ang LSI, Authorized Person Outside Residence (APOR), Returning Overseas Filipinos (ROF), kag Overseas Filipino Workers (OFW) bangud nadiskubre sang probinsya nga mahimo ang mga ini malatnan samtang nagatravel.
Ginpahayag man sini nga kun madamo ang test nga mapatigayon sang Teresita Lopez Jalandoni Provincial Hospital (TLJPH) Molecular Laboratory, madamo man ang mapagwa nga resulta.
Wala pa ini makakita sang test result sa mga DRRM responders kag frontliners apang nagapanawagan ini sa publiko nga indi pag-idiscriminate ang mga frontliners bangud mga high risk na ini kag indi malipod nga malatnan bangud sa risgo sang ila ginaubra.
Regular naman ang mga responders nga ginapaswab test agud mahibaluan ang ila health status kag mahibaluan man nga good shape pa sa pagtuman sang ila obligasyon.
Samtang, may yara sang kabug-usan nga 56 ka mga Negrense OFWs nga nag-abot kaina sang aga kag ginsugat sa airport agud idul-ong sa hotel.
Ang Overseas Workers Welfare Administration (OWWA) ang nag-arrange sang flight kag hotel nga tiniran sang mga ini.
