Nagdeploy sang dugang nga suldado sa Negros Oriental ang 11th Infantry Battalion sang Philippine Army kasuno sang pagpatay kay Governor Roel Degamo sang March 4.
Ginpatigayon ang deployment agud nga magbantay sa pila ka bahin sang probinsya kag magpadayon sa paglagas sa mga nabilin pa nga mga suspetsado sa pagpatay sa gobernador kag walo ka iban pa.
Sa pahayag nga ginpagwa sang Armed Forces of the Philippines (AFP) Visayas Command, ang tropa ang ginbug-usan sang personnel nagikan sa anum ka Army Battalions sa Negros Island nga ginalakipan sang 11th Infantry Battalion; 94th Infantry Battalion; 79th Infantry Battalion; 62nd Infantry Battalion; 15th Infantry Battalion, kag 47th Infantry Battalion.
Sila ang igadeploy sa 3rd kag 2nd districts sang Negros Oriental agud nga pasanyugon ang joint law enforcement operation sa probinsya.
Ginpahayag ni AFP Visayas Command commander Lieutenant General Benedict Arevalo nga ang tropa ang magatrabaho upod sa Philippine National Police (PNP) agud nga pabaskugon ang joint law enforcement efforts agud nga madakpan ang nabilin nga mga suspek sa pagpatay kay Governor Degamo.
Sa interview sang Bombo Radyo kay Brigadier General Leonardo Pena, commander sang 302nd Infantry Brigade, ang pag-abot sang 50 ka miyembro sang Light Reaction Company ang dugang nga pwersa sa mga special mission sang Armed Forces of the Philippines kag Philippine National Police.
Suno diri ang skills kag talento sang Light Reaction Company ang magamit ilabi na kun may yara sang reported nga possible location sang mga suspetsado nga sa karun ginakabig nga wala pa nakagwa sa Negros ang mga ini.
Pahayag sini, padayon ang pursuit opeartion sa mga suspetsado sa pagpatay sa gobernador kag walo nga iban pa.// Ginkalipay man sini nga nakita sang national government ang importansya sang mga kinahanglanon sang units.
