Ginkompirmar sang provincial administrator sang Negros Occidental nga may ipatindog na naman nga molecular laboratory paagi sa joint venture sang probinsya kag isa ka pribado nga kompaniya.
Sa interview sang Bombo Radyo kay Atty. Rayfrando Diaz, ginpahayag sini nga ang ikaduha nga molecular laboratory ang ipatukod sa Valladolid District Hospital paagi sa joint efforts sang probinsya kag Safeguard Diagnostics nga nakabase sa Manila.
Suno kay Diaz, ang Safeguard Diagnostics ang mahatag sang tanan nga gamit samtang ang probinsya naman ang magapreparar kag magasto sang lugar sa sulod sang Valladolid District Hospital.
Gindugang man sini nga magabaton sang P95,000 kada bulan ang probinsya nagikan sa pribado nga kompaniya bilang renta kag makabaton man sang 5% nga rebate nagikan gross receipt sang kompaniya.
Suno diri, indi lang mga taga southern Negros ang makabenepisyo sang ipatukod nga lab bangud kun magbag-down ukon magkaproblema ang molecular laboratory sa Teresita Lopez Jalandoni Provincial Hospital, may yara pa sang magamit ang probinsya.
Gindugang man sini nga US made ang mga machines kag test kits nga pagagamiton agud kun magkaproblema sa supplier sang nauna nga laboratoryo, indi maapektuhan ang sa Valladolid.
Suno kay Diaz, nagalaom ini sang maayo nga partnership sa pagpatukod sang laboratoryo nga makabenepisyo sa duha ka partido.
