Dako ang kinahanglanon nga pondo para sa mga evacuees bangud sa paglupok sang Bulkan Kanlaon.
Suno kay Office of Civil Defense Region 6 Director Raul Fernandez, gin-aprubahan na sang OCD ang ginrequest nga P70 million bilang dugang nga pondo agud nga ibulig sa mga evacuees bangud sa paglupok sang Bulkan Kanlaon.
Suno kay Fernandez, nakahanda naman ang ciudad sang Himamaylan sa pag-akomodar sang posible nga pagsaylo sa ila nga lugar sang mga evacuees nagikan sa banwa sang La Castellana.
Sang tinalikdan nga inadlaw nagpatigayon sang onsite assessment ang Office of the Civil Defense Western Visayas, Regional Incident Management Team kaupod sa local government sang Himamaylan City sa mga posible evacuation sites.
May yara naman sang Memorandum of Agreement ang La Castellana kag Himamaylan City sa tion nga sayluhon ang mga evacuees.
Suno kay Fernandez ang Himamaylan City ang mas malapit nga sayluhan sang mga evacuees ingkaso gid man nga maglala ang sitwasyon.
Suno diri ang siudad sang Kabankalan bukas man sa pagbaton sang mga na displace bangud sang bulkan Kanlaon.
Padayon ang close monitoring sang Office of the Civil Defense sa PAGASA ilabi na sa mabunok nga pag-ulan dala sang malain nga panahon nga gina kahangaw-an maga tuga sang lahar flow.
Ini ang mangin basehan sa pag extend sa 10km danger zone kag sa pag evacuate sa mga apektado.
Samtang, gin-athag man ni Fernandez nga ang ginhimo nila nga basehan sa pagpagwa sang hazard map ang ingkaso sa worst case scenario.
Ang nasambit nga mapa ang mangin basehan sang massive evacuation planning or expanding the danger zone.
Ginkonsiderar man ang numero sang maapektuhan nga populasyon.
Ginalantaw kun maapektuhan sang lahar flow ang Poblacion, La Castellana kapin sa 60,000 persons ang mahimo maapektuhan.
Sa karun, ginahulat nalang ang abiso sang OCD central office angot sa naapruhan nga P70 million nga bulig sa mga evacuees.
Gin-aprubahan man ni President Ferdinand “Bongbong” Marcos Jr ang P60 million nga bulig sa Mt. Kanlaon victims sa Negros Oriental.
