Ginpahayag sang bise alkalde sang ciudad sang Bacolod nga paga-tingbon na lang ang pagtalakay sa ginapangayo nga additional 25 hectares sang Bacolod Real Estate Development Corporation (BREDCO) kag pagpamatok diri sang Alamana Property and Development Corporation (APDC).
Sa interview sang Bombo Radyo Bacolod kay Bacolod City Mayor El Cid Familiaran, una nga gintalakay sang Sanggguniang Panlungsod ang request nga Resolution of No Objection (RONO) sang BREDCO angot sa additional nga reclamation para sa pagdevelop sang ila puerto.
Ang Bredco Port kag Reclamation Project ang yara sa idalum sang agreement sang ciudad kag Comprehensive Revised Reclamation Agreement (CRRA) kag Philippine Reclamation Authority (PRA) nga nagapahanugot nga makareclaim ang BREDCO sang 250 hectares.
Nagahingyo sa karun ang BREDCO sang dugang nga 25 hectares para sa pagpadevelop sang ila nga puerto.
Ini pa sa karun ang ginatun-an bangod nga nagapamatok diri ang Alamana Property and Development Corporation (APDC), nga suno diri, ila ginbakal ang area sa BREDCO apang ang area ang nalakip sa tinutuyo nga I-reclaim sang sini.
Suno kay Familiaran, isahon na lang ang pagtalakay sa duha nga issue agud nga mahatagan ini sang solusyon.
Ginalantaw man sini nga magapaitgayon pa sang series of consultation kag public hearing ang komitiba angot diri.
Samtang, sa bahin naman sang APDC, ini nakasumiter sang ila mga dokumento kag suno sa bise alkalde dapat nga maghatag sang sabat si BREDCO sa alegasyon sang APDC.
