Nagalaom ang gobernador sang Negros Occidental nga ang P100,000 nga ginpanagtag sa mga centenarians ang makapa-ugyon sa pamilya sang benepisyaryo kag indi mangin rason sang away pamilya.
Nahibaluan nga dugang nga pito ka mga centenarians nagikan sa apat ka mga local government units ang ginhatagan sang tag P100,000 nga cash assistance kag certificates sa ila mismo mga puluy-an nga ginpangunahan ni Governor Eugenio Jose “Bong” Lacson kahapon.
Ini ang ginalakipan sanday Consuelo Mamigo, Helasio Bobon kag Salvacion Lacson nagikan sa banwa sang Cauayan; Amparo Teorima sang Isabela; Loreto Nalang sang La Castellana; kag Rosa Managuit kag Fortunata Libo-on sang La Carlota City.
Yara man sa ginpatigayon nga pagpanagtag sanday Sixth District Board Member Jeffrey Tubola, Cauayan Mayor John Rey Tabujara and Vice Mayor Anna Liza Soriano, Isabela Mayor Irene Montilla, La Castellana Mayor Rhumyla Mangilimutan, La Carlota City Mayor Rex Jalando-on, kag Provincial Social Welfare and Development Office OIC Merle Garcia.
Suno kay Lacson, manami ini nga klase sang programa kag nagalaom nga indi ini ang mangin tunaan sang away sa pamilya.
Nagalaom ang gobernador nga ang ila nabaton nga kwarta ang mangin rason agud magbuligay nga mag-ugyon ang mga himata sang benepisyaryo.
