Dugang pa gid nga mga online resellers ang naggwa agud nga magreklamo batok sa supplier nga residente sang Barangay Bata, ciudad sang Bacolod nga ginaalegar nangscam sa ila bangud wala sang gindeliver nga items bisan dako na nga kantidad ang ila nabayad.
Sa interview sang Bombo Radyo sa isa ka estudyante sa Bacolod nga naghingyo nga indi paghingadlan sa kahanginan, nakita niya sa internet ang negosyo ni Zaila Marie Dalida sang Purok Sawmill, Barangay Bata bangud madamo man ang nagabakal diri sang items nga overruns sang branded nga mga bayo.
Sang Enero, nag-abot ang una nga order sang estudyante nga abyan man mismo ni Dalida apang indi ang exact nga items nga gin-order ang gindeliver.
Suno diri, nagsalig sila kay Dalida bangud nagpakita man ini sang business permit nga nakapangalan sa iya gani sila ang nagpati ang registered ang negosyo sini.
Suno sa tagreklamo, nagpangayo ini sang kapital sa iya amay kag nagdangat na sa P46, 000 ang kabug-usan niya nga order apang ang una lang ang nadeliver.
Suno diri, may iban pa gid ini nga kaupod nga nag-order man kay Dalida kag wala nakabaton sang items.
Kahapon nakibot na lamang ang reseller nga gindeactivate ni Dalida ang iya nga Facebook account.
Bangud sini, nagpanawagan ang abyan sang ginaalegar nga scammer nga magpakita ini sa ila agud nga masettle ang iya balayran kag makapaathag kun ngaa wala nadeliver ang nabayaran na nila nga order.
