Nangin madinalag-on ang Dugong Bombo 2023: A little pain, a life to gain sang Bombo Radyo Philippines nga ginpatigayon sa bilog nga pungsod kahapon.
Sa pagbuligay sang Bombo Radyo Philippines, Bombo Radyo Philippines Foundation Incorporated kag Philippine Red Cross nakatipon sang 5,563 ka successful blood donors, kun sa diin nakatipon sang 2,503,350 cubic centimeters (CC) sang dugo nga katumbas sang 2,503.35 litro, 661.31 gallons ukon 12.02 drums sang dugo.
Matapos ang tatlo ka tuig nga pagpahuway matapos ginpatuman ang COVID-19 protocol, liwat nga ginbalik ang nationwide bloodletting program sang Bombo Radyo Philippines kun sa diin madamo sang mga pumuluyo ang nagsabat sa panawagan nga magbulig kag magdonar sang dugo, agud makasugpon sa kabuhi sang mga nagakinahanglan.
Alas-8:00 kahapon sang aga sang ginsuguran ang Nationwide Bloodletting Activity, gilayon man nga nagpila ang mga blood donors gikan sa nagkalainlain nga venue.
Ang Nationwide bloodletting activity ang ginpatigayon sang Bombo Radyo Philippines sa 24 ka mga key cities kun sa diin naga-operate ang mga estasyon sang Bombo Radyo kag Star FM.
Kadungan sa madinalag-on nga Dugong Bombo 2023: A little pain, a life to gain sang Bombo Radyo Philippines, dako man ang amo nga pagpasalamat sa tanan nga mga nakigbahin sa nanarisari nga bahin sang pungsod.
Partikular na sa mga katapo sang uniformed personnel nga wala naga-untat sa pagsuporta kag pagbulig agud madinalag-on nga mapatigayon ang nasambitan nga programa, sa mga sibilyan nga nagpila sa mga venue kag sa Philippine Red Cross nga nagbulig sa kabug-usan nga aktibidad.
Ang Dugong Bombo 2023: A little pain, a life to gain sang Bombo Radyo Philippines ang sunod sa panan-awan ni Dr. Rogelio Florete, chairman of the Board sang Bombo Radyo Philippines kag ginsundan ni Ms. Margaret Ruth C.Florete, ang Presidente kag Chief Executive Officer sa Bombo Radyo Philippines, nga mapasaka ang ihibalo sang ordinaryo nga Pilipino sa impact sang donasyon sang dugo kabuhi sang madamo.
Samtang sa 24 ka mga key cities, ang area sang Bombo Radyo Gensan lamang ang wala nakapatigayon sang Blood Letting Activity, bangod ang mga establishimento sa lugar ang naapektuhan sang magnitude 6.8 nga linog.
Dako ang amon nga pagpasalamat sa nanarisari nga sektor kag organisasyon nga nagvolunteer kag nagdonar sang dugo, mga eskwelahan, religious sector kag madamo ka iban pa nga nagdonar sang dugo.
Ginapasalamatan man namon ang mga sponsors nga nga nagpagamit sang venue kag naghatag sang nanarisari nga bulig.
Kasubong man sa mga kusa nga nagpadulong agud magdonar sang dugo, apang napaslawan bangod sa pila ka konsiderasyon, kaangay sa isyu sa ikaayong lawas.
Ginadayaw man namon ang mga nakabatun sang token of appreciation nga P1,000 tubtob sa P5,000 sa kada venue sang Dugong Bombo 2023.
