Nagdangat sa 48 ang kabug-usan nga successful blood donors sa ginpatigayon nga bloodletting activity sang Philippine Red Cross in partnership with Dugong Bombo sa Barangay Alacaygan banwa sang EB Magalona kaina sang aga.
Suno kay Glendale Jamile, chief nurse sang EB Magalona Municipal Health Unit, 19-anyos ang pinakabata nga successful blood donor samtang 58-anyos naman ang pinakatigulang.
Nalipay naman ini bangud sa nangin resulta sang bloodletting activity bangud madamo ang nagpakigbahin apisar nga tiempo sang galing sang tubo.
Samtang, gina-engganyo naman ni Punong Barangay Larry Sumpay sang Barangay Alacaygan ang mga pumuluyo sini nga magpasakop sa masunod pa gid nga mga bloodletting activities sang ila barangay.
Suno kay Sumpay, mas mahapos nalang sa ulihi para sa ila kun may yara sang nagakinahanglan sang dugo kun madamo ang magadonar.
Nahibaluan nga nagapatigayon sila sang bloodletting activity duha ka bes sa isa ka tuig.
Nagapati naman ang isa ka successful blood donor nga si Barangay Kagawad Yulie Del Rosario nga makasalbar sang kabuhi ang iya nga dugo gani nga nagadonar gid ini kun may yara sang bloodletting activity.
Suno sa iya ini na ang ika-pito nga pagpakuha niya sang dugo kag nanamian gid siya sa maayo nga epekto sini sa iya nga lawas.
