Handa na ang EB Magalona Health Center sa pagahiwaton nga blood letting activity sang Philippine Red Cross in partnership sa Bombo Radyo Bacolod subong nga adlaw sa Barangay Nanca, EB Magalona, Negros Occidental.
Suno kay Dra. Glendale Jamili, municipal nurse sa EB Magalona Health Center, ginhambalan na sini ang mga nurses nga magpreparar kag dapat nga sa covered court himuon ang bloodletting activity.
Bangod naman sa pandemya tuga sang COVID-19, ginpakamaayo na lamang ni Dra. Jamili nga ang mga magadonar lang sang dugo ang makasulod sa venue.
Samtang wala man ginapahanugutan ang mga naga-edad 21 panubo.
Samtang may mando naman sa mga ini nga 50 lang ang maximum nga donors nga pwede makuha sang mga ini.
Suno kay Dra. Jamili, kada tuig na nga nakaandan sang banwa ang pagdihon sang mobile blood donations.
Ginakumbinsi sini ang mga punong barangay nga magpatigayon man sang programa makaduha ka beses kada tuig.
Samtang angot naman sa partisipasyon sang Bombo Radyo Bacolod, magabaton sang Dugong Bombo t-shirt para sa mga successful blood donors.
Suno kay Dra. Jamili, ang Barangay Nanca amo ang may pinakamadamo nga donor sa bug-os nga banwa.
Apang bangod naman sa pandemic, wala sila sang mahimu kundi magsunod sa mga limitasyon kaangay sang maximum nga 50 donors kag ang programa ang magadugay lang sang tatlo tubtob apat ka oras.
Panawagan naman sang doktora sa mga taga-Barangay Nanca nga makigbahin sa aktibidad nga himuon sa ila mismo nga covered court.
