Duha ang arestado samtang isa naman ang nakapalagyo sa buybust operation nga ginpatigayon kahapon sang hapon sa Barangay 31, Libertad, Bacolod City kun sa diin narecover ang balor P680,000 nga suspected shabu.
Ang joint operation ang ginpatigayon sang Philippine Drug Enforcement Group – Special Operations Unit 6 (PDEG-SOU6) kag Bacolod Police Station 6 sa atubang sang BPI Libertad sa Barangay 31.
Natigayon nga madakpan sanday Rolly Moncillo Asumbre, residente sa Barangay 14, Bacolod City kag ginakabig nga High Valued Individual (HVI) kag si Inocentes Villanueva Posadas, may-asawa kag residente sa Barangay Kabanbanan, Himamaylan City, Negros Occidental.
Samtang nakapalagyo naman si Ericson Abillana, 29 anyos, single kag residente sa Barangay 40, Bacolod City.
Narecover sa paghinakop sang mga suspetsado ang 20 ka sachet sang suspected shabu nga ginabanta nagabug-at sang 100 grams kag balor P680,000.
Nakuha man gikan sa mga ini ang P1,000 bill nga buybust money kag isa ka unit sang indi lisensyado nga .22 caliber revolver nga may unod nga isa ka buhi nga bala.
Ang mga suspected shabu nga narecover ang igaturn-over sa Provincial Crime Lab Office para sa examination samtang ang mga non-drug items naman ang yara sa kustodiya sang Special Operations Unit 6 para sa nagakaigo nga disposisyon.
Sa pihak nga bahin, ginpanginwala naman ni Inocentes Villanueva Posadas nga may kaangtanan ini sa iligal nga transaksyon.
Suno sa iya, isa lang ini ka taxi driver kag natabuan lang nga amo ang ginsakyan ni Asumbre.
Panindugan sini nga karun lang nakasakay sa iya si Asumbre kag indi niya ini kilala.
Ginpakigbahin man sini nga wala sang iligal nga droga nga narecover gikan sa iya kag ang mga recoveries ang lunsay gikan lang kay Asumbre.
