Tatlo ka sunog ang nagluntad sa ciudad sang Bacolod kagab-i, Nobyembre 1, All Saints’ Day.
Sa interview sang Bombo Radyo Bacolod kay Fire Superintendent Jenny Mae Masip, fire marshal sang Bacolod City Fire Station, alas-7:40 kagab-i nareport ang sunog sa Purok Lemon Grass, Barangay Cabug samtang nafireout naman ang kalayo alas-7:50 sang gab-i.
Totally burned ang balay nga ginapanag-iyahan ni Osalie Guarte, samtang nagdangat naman sa P60,000 ang estimated damage.
Ang sunog ang ginatudlo gikan sa nabiyaan nga kandila para sa nagtaliwan sini nga utod.
Samtang nagapakigbato sa sunog sa Brgy Cabug, sila ang nakabatun naman sang tawag alas-8:20 kagab-i, tuhoy sa sunog sa Purok Badiang, Barangay Sum-ag.
Kun sa diin isa man ka balay ang totally damaged nga ginapanag-iyahan ni Jundel Aurelio.
Suno kay Masip, nakaangkon sang gamay nga paso sa kamot si Aurelio apang ini ang halos indi man makit-an samtang kaangay nga kandila para sa piyesta minatay man ang ginatudlo nga rasun.
Apang nalipungan naman ang 18 anyos nga hinablos sang tag-iya matapos makaangkon sang kabudlayan sa pagginhawa.
Paathag ni Masip nga wala na makasulod ang firetruck sa makitid nga area kag natupok na ang nasambitan nga balay nga may estimated damage nga P6,250.
Ang ulihi nga sunog sa ciudad ang nagluntad sa Paglaum Village, Barangay Masilingan nga nareport alas-10:57 kagab-i.
Totally damaged man ang balay nanday Mialyn kag Leonardo Lobaton kag ang balor sang kahalitan ang ginabanta P10,000.
Sa karun padayun pa nga ginatumod ang rasun sang sunog.
Suno kay Masip sila ang wala ginakapoy sa pagpahanumdom ilabi na nga sang UNDAS 2023, duha man nagluntad nga sunog tuga sang kandila kag subong nga UNDAS 2024, Nobyembre 1 pa lamang tatlo na ang sunog kag duha diri ang tuga sang kandila.
Pahanumdom sini nga bantayan gid ang ginasindihan nga kandila kag indi magsalig sa pagbiya sa balay sa pagpinsar nga magabalik man gilayon.
Ini ang mas maayo nga patyon kun biyaan ukon ibutang sa lugar nga wala sang malab-ot nga mahimo masunog.
