Dead on the spot ang duha ka mga lalaki nga nagaangkasanay sa motorsiklo matapos makabunggo sa center island sa Lopez Jaena Street, Barangay Villamonte, Bacolod City alas 4:40 kaina sang kaagahon.
Suno kay Police Master Sergeant Romel Rizaldy, Traffic Investigator sang Bacolod Traffic Enforcement Unit, nagabyahe nagikan sa BS Aquino Drive padulong sa sur nga direksyon sang Lopez Jaena Street ang motorcycle rider amo si John Denz Casuyon, 21 anyos residente sang Purok Mahogani, Brgy Handumanan, Bacolod City, samtang angkas sini si Jhon Wennel Dingcong, 21-anyos, residente sang Purok Totong 1, Barangay Felisa, Bacolod City.
Suno sa mga nakawitness, madasig ang pagpadalagan sang motorsiklo rason kun ngaa aksidente ini nga nakabunggo sa pabilog nga center island.
Nagtabog ang si Dingcong kag nabunggo sa poste samtang suno sa mga nakakita, naglupad naman ang motorsiklo sakay ang rider antes nagtupa sa duta.
Bangud sa kakusog sang impact, nakaangkon sang patal nga pilas ang duha sa ulo nga gintunaan sang ila kamatayon kag nagguba man ang ila ginasakyan nga motorsiklo.
Ang ila bangkay ang gindala sa ABE Funeral Homes.
Wala sang suksok nga helmet ang duha.
Samtang sa interview kay Traffic Enforcement Unit Head Police Major Elmer Bonilla, ginapahayag sang traffic investigator nga mahimo naka-inom sang makahulubog nga ilimnon ang duha ka biktima.
Panugyan sini sa mga motorista nga kun naka-inom kag indi na masarangan, mas maayo nga ibilin na lamang ang salakyan kag magpadul-ong sa balay ukon diin man nga padulong sa taxi, grab ukon motorsiklo.
