Arestado ang duha ka mga anay preso sa duha ka separado nga buy bust operation nga ginpatigayon sa Barangay 2, Bacolod City.
Arestado si Princemhol Javier, alyas Noy, 25 anyos, wala sang trabaho, kag residente sang Purok Sigay, Barangay 2, Bacolod City sa buy bust operation nga ginpatigayon sang Bacolod City Police Station 2, kahapon, alas 3:45 sang hapon.
Sa interview sang Bombo Radyo kay Police Captain Glenn Montano, hepe sang Bacolod City Police Station 2, nakaagi na preso si Javier sa kaso nga robbery- hold up kag kaso angot sa illegal nga druga.
Nakuha sa paghinakop sini ang 11 grams sang suspected shabu nga ginabanta nagabalor sang P74,800.
Sa karun yara na sa kustodiya sang Bacolod Police Station 2 ang suspetsado.
Samtang arestado man ang isa ka babayi nga anay-preso sa buy bust operation nga ginpatigayon sang Bacolod City Police Station 2 sa Barangay 2 kahapon, alas 9:01 sang gab-i.
Sa interview sang Bombo Radyo kay Police Captain Glenn Montano, hepe sang Bacolod City Police Station 2, nakuhaan sang 20 grams sang suspected shabu si Necole Maureen Cawaling.
Ang walo ka sachet sang suspected shabu ang ginabanta nga nagabalor sang P136,000.
