Masobra P1.1 million ang balor sang narecover nga suspected shabu gikan sa duha ka asod-asod nga drug buybust operation sang Bacolod City Drug Enforcement Unit kaina sang kaagahon kag kagab-i.
Alas-3:30 kaina sang kaagahon, narecover ang balor P680,000 nga suspected shabu sa duha ka persona sa Purok Tahong, Brgy 2, Bacolod City.
Ang subject sang buybust amo si Swey Mark Jimena alias Tamtam, 29 anyos, lalaki, single, wala sang trabaho, ginakabig nga high value individual, samtang naaresto man ang street level individual nga si Ezel Jimena, 48 anyos, babayi, kasado, wala sang trabaho, lunsay residente sa nasambitan nga lugar.
Narecover sa duha ang isa ka nakabugkos nga plastic bag kag walo ka sachet sang suspected shabu nga ginabanta nagabug-at sang 100 grams, sa balor nga P680,000.
Ang duha ang nakahunong na sa Bacolod Police Station 2.
Samtang antes sini, balor P455,600 naman ang narecover nga suspected shabu sa anom ka lalaki sa drug buybust operation nga ginpatigayon sa Purok Paghidaet, Brgy. Tangub, Bacolod City alas-6:17 kagab-i.
Ang subject sa operasyon amo ang high value individual nga si Aholiab Montias alias Yabyab, 28 anyos, single, wala sang trabaho kag residente sa nasambitan nga lugar.
Samtang naaresto man ang lima ka street level individual nga sanday Manuel Tolentino III, 40 anyos, single, jobless, residente sang Prk Sunflower, Brgy Tangub; Reynaldo Manalo, 22 anyos, single, jobles, residente sang Prk Paghidaet, Brgy Tangub; Richard Corsonada, 32 anyos; Kyril Marvin Anib, 23 anyos; kag Wilfren Escalicas, 24 anyos nga lunsay single, laborer kag residente sang Prk Kasilingan, Brgy Alijis, Bacolod City.
Narecover sa ila paghinakop ang isa ka nakabugkos nga plastic bag kag walo ka sachet sang suspected shabu lakip na ang buybust item nga ginabanta nagabug-at sang 67 gramos kag may standard drug price nga P455,600.
Ang mga naaresto sa magkasunod nga drug buybust operation ang lunsay mangatubang sang kaso sa paglapas sang Republic Act 9165 ukon Comprehensive Dangerous Drugs Act of 2002.
