Nagdangat sa kapin P400,000 ang balor sang halit sa nagluntad nga sunog sa gasolinahan sa Gatuslao st, Brgy 11, kahapon sang aga.
Sa interview sang Bombo Radyo kay Fire Officer 2 Anthony Val Isansa, fire arson investigator sang Bureau of Fire Protection- Bacolod City, may isa ka salakyan nga nagpagasolina sa gas station apang hinali lang nga naglakat ang salakyan samtang nakatakod pa ang nozzle sang gas pump.
Bangod sini natumba ang gas pump kag bangod sa electrical short circuit, nag-ibwal ang kalayo kag nasunog ang gas pump.
Pahayag ni Isansa, posible nga nalipatan sang driver sang salakyan nga ginatughong pa ang gasolina, ukon nalagyo ini para sa iya safety apang may impormasyon nga nag-untat pa ang driver kag nakita ang sunog apang naglakat lang ini gilayon.
Samtang, padayon pa ang imbestigasyon sa nagluntad nga sunog sa Purok Paglaum, Brgy Taculing, Bacolod City kahapon sang udto.
Suno kay Fire Officer 2 Anthony Val Isansa, fire arson investigator sang Bureau of Fire Protection- Bacolod City, totally damaged ang isa ka balay samtang may isa pa gid ka balay nga partially damaged.
Suno diri, ang totally damaged nga balay ginapanag-iyahan ni Jessela Suarez kag naga-arkila diri amo si Ronilyn Mabakyaw.
Samtang ang partially damaged naman nga balay ginapanag-iyahan ni Annaly Mondragon.
Suno kay Isansa, nag-umpisa sa salas sang balay ni Suarez ang kalayo apang ang nagarenta nga si Mabakyaw, wala man nagatinir didto kag ginabilinan lang sini sang gamit ang balay.
Suno sa pumuluyo, may duha ka menor de edad nga hinablos ni Mabakyaw nga nakit-an nga nagsulod sa balay antes ang sunog.
Pahayag ni Isansa, padayon ang ila imbestigasyon kun ano ang gintunaan sang kalayo nga nagresulta sa sunog.
