Gintay-og sang duha ka asud-asud nga linog ang Balut Island sa Sarangani, Davao Occidental kagab-i, Enero 10, suno sa Philippine Institute of Volcanology and Seismology (PHIVOLCS).
Ang una nga narecord amo ang magnitude 6.8 nga linog nga natabo alas-10:58 sang gab-i kun sa diin ang sentro sini ang yara sa ginabanta 315 kilometer sa sur 40 degrees east sang Balut Island kag may kadaluman nga 10 kilometers.
Ini ang nagpakita sang instrumental readings sang Intensity II sa Malungon kag Kiamba sa Sarangani; Koronadal City kag Tupi sa South Cotabato kag Palimbang sa Sultan Kudarat.
Ginsundan naman ini sang magnitude 5.2 nga linog alas 11:15 sang gab-i sa amo nga adlaw nga may 350 kilometer sa sur 38 degrees east sang nasambit nga lugar kag may kadalumon nga 10 kilometers.
Wala naman sang Tsunami threat sa Pilipinas matapos ang nasambit nga linog.
