Duha ka balay, ginlamon sang kalayo sa sunog nga nagluntad sa La Carlota City kahapon

Duha ka balay ang ginlamon sang kalayo sa sunog nga nagluntad sa Zone 5, Sitio Catalina, Barangay 2 (Poblacion), La Carlota City pasado alas-4:30 kahapon sang hapon.

Sa interview sa personnel sang Bureau of Fire Protection – La Carlota City, nagdangat sa 50 square meters ang kalaparon sang nasunog nga area.

Apat ka pamilya naman ukon 16 ka indibidwal ang nadulaan sang puluy-an kag sa karun nagatinir sa multi-purpose hall sang Barangay.

Napalong ang kalayo alas-4:56 sang hapon.

May 63 anyos naman nga babayi nga nakaangkon sang kabudlayan sa pagginhawa, nga mahimo tuga sang edad, nahaklo nga aso kag kakulba.

Ini ang gilayon man nga gindala sa La Carlota City Hospital kag estable naman ang kahimtangan.