1st victim: Motorsiklo kag bangkay, nasapwan sa Hacienda San Isidro, Barangay Concepcion, Talisay City (2:20am)
Tatlo ka bangkay ang nasapwan sa magkalapit lamang nga lugar sa ciudad sang Talisay subong nga adlaw, kag lunsay wala pa matumod ang identity.
Ang una nga bangkay ang nasapwan sa Hacienda San Isidro, Barangay Concepcion, Talisay City alas-2:20 sang kaagahon.
Sa imbestigasyon sang Talisay City Police Station, may nakalabay nga motorsiklo kag tricycle sa grupo sang mga pamatan-on kag nagpahibalo nga may nakit-an nga abandonado nga Euro Viper Man 150 nga motorsiklo sa kilid sang kakampuhan, kag may helmet nga nahamtang sa kilid sang motorsiklo.
Sa pagtsekyar sang mga pamatan-on sa area, didto nila nasapwan ang bangkay sang isa ka lalaki.
Ini ang ginpabalo sang mga teenagers sa 37 anyos nga residente sa lugar, kag amo ang nagreport sa Talisay City Police Station.
Ang biktima ang ginabanta naga-edad sang 45 tubtob 50 anyos, nakasuksok sang blue nga t-shirt, maong short pants kag green nga tsinelas.
Ang motorsiklo ang may plate number nga 061609, nga black and white color combination.
2nd victim: Nagaka-agnas nga bangkay, nasapwan sa katupad nga Hacienda Minuluan Mendoza, Barangay Matab-ang, Talisay City (9:00am)
Nasapwan naman ang ikaduha nga bangkay alas-9:00 kaina sang aga sa Hacienda Minuluan Mendoza, Barangay Matab-ang, Talisay City.
Ang bangkay nga yara na sa advance stage of decomposition ukon nagaka-agnas na ang nasapwan sang 45 anyos nga kabo sang nasambitan nga hacienda sa kilid sang katubuhan.
Suksok sang biktima ang blue nga shorts.
3rd victim: Bangkay, nasapwan malapit lang sa kun diin nakita ang una nga biktima (2:00pm)
Samtang alas-2:00 subong nga hapon, isa naman ka bangkay ang nasapwan sa parehas nga kampo sa Hacienda San Isidro, Barangay Concepcion, Talisay City kag malapit lamang sa una nga bangkay.
Ang bangkay ang nakita sang 51 anyos nga kabo sa sulod sang kampo, kag gilayon sini nga ginpahibalo sa isa ka residente nga amo ang nagreport sa Talisay City Police Station.
Ang biktima ang ginabanta naga-edad sang 35 tubtob 40 anyos.
Ini ang nakasuksok sang blue nga sando, maong pants, itom nga rubber shoes kag may tattoo sa iya natuo nga abaga.
May narecover man sa lugar nga yabi sang motorsiklo, isa ka kitchen knife kag itom nga sling bag nga may unod nga tools.
