Duha ka asod-asod nga bangkay sang babayi ang nasapwan sa Crossing Magallon, Moises Padilla.
Ang una nga bangkay ang nasapwan sa Hacienda Pilar samtang ang ikaduha ang nakita naman sa Hacienda Sto. Domingo parehas sa Crossing Magallon.
Ang una nga biktima ang ginkilala nga si Lelith Villar, nagabusong, yara sa 40 ang edad, residente sa Brgy Panubigan, Canlaon City.
Sa exclusive interview sang Bombo Radyo Bacolod kay Rick Lapus, bilas sang biktima, kapin alas-9:00 tubtob alas-10:00 sang aga sa kasagsagan sang paglaslas sang Bagyo TINO sang una nga gintabok sang bana sang biktima ang ila bata sa evacuation center.
Apang sang ginbalikan sini ang asawa sa ila balay nga malapit sa sapa, haligi nalang ang nabilin sa ila balay bangod ini ang gin-anod na sang tubig.
Kaupod nga naunod sang biktima ang iloy sini nga si Sally nga kapin 60 anyos.
Pila ka adlaw man nila nga ginpangita ang mag-iloy, kag nagtsekyar na sa banwa sang Isabela, Hinigaran, Binalbagan.
Kaina pabalik na kuntani sila sa Canlaon City sang malabayan ang pagrecover sang bangkay gikan sa kakampuhan sa Hacienda Pilar, Crossing Magallon, Moises Padilla.
Ginsundan nila tubtob sa punerarya kag didto gintsekyar, kun sa diin nakumpirmar sang bana ang identity sang biktima bangod sa agi sang operasyon sini sa dughan kasubong man sa suksok nga singsing.
Samtang, nasapwan ang ikaduha nga bangkay sang babayi sa banwa sang Moises Padilla nga biktima sang bagyo TINO.
Pasado alas- 2:00 subong nga hapon may nasapwan nga bangkay sang babayi sa Hda. Sto. Domingo, Brgy Crossing Magallon, banwa sang Moises Padiila.
Ang bangkay may malaba nga buhok, may kulintas kag duha ka singsing apang wala na sang panapton kag yara na sa advance state of decomposition.
Sa interview sang Bombo Radyo kay Jericho, operator sang back hoe, kaina sang nagakutkut ini sa nagtululumpok nga mga dahon sang tubo apang nag-untat siya bangod may napanimahoan ini nga mabaho.
Suno diri, sang nagbalik ini kutkut subong nga hapon, nakita sini ang bangkay sang babayi nga nagatakilid nga natabunan sang dahon sang tubo.
Sa karun wala pa sang identity ang nasapwan nga bangkay.
Madumduman nga kaina sang aga may isa man ka bangkay sang babayi ang nasapwan sa Hda Pillar, Brgy Crossing Magallon, kag ini nakilal-an na kag natukiban nga ini residente sang Canlaon City, Negros Oriental apang naanod kag nasapwan na sa probinsya sang Negros Occidental
