Napalubong na sa Handumanan Cemetery ang duha ka mga bangkay nga nasapwan sa sulod sang tamburong sa Bag-ong dalan, Barangay Felisa, Bacolod City sang Domingo sang hapon.
Sa interview sang Bombo Radyo Bacolod kay P/Maj. Richard Fajarito, station commander sang Bacolod Police Station 10, subong pa nga adlaw magagwa ang autopsy result sang mga bangkay.
Apang santo sa medico legal, natukiban nga wala sang samad ang mga biktima kag nakumpirmar nga lunsay mga lalaki.
Madumduman nga duha ka bangkay ang nasapwan sa sulod sang tamburong kun sa diin ang isa ang nagaka-agnas na samtang ang isa naman ang kumpleto pa nga nakasulod sa duha ka gintakop nga sako.
Suno kay Fajarito, ang lalaki nga nasulod sa sako ang may-ara sang tattoo sa nawala nga abaga nga sa paglantaw sini iya sang fraternity apang indi pa sini matumod kun ano nga grupo.
Samtang ang nagakaagnas naman nga bangkay ang may nabilin pa nga bahin sang jeans kag ini ang size 26.
Suno sa hepe santo sa medico legal, mahimo nga una nga ginpatay ang bangkay nga yara na sa advance state of decomposition apang may posibilidad man nga dungan ang mga ini sang ginpatay apang na-ulihi lamang nga nadecompose ang ginsulod sa sako bangod ini ang wala ma-expose sa hangin.
Nakita man sa resulta nga lunsay wala sang samad ang mga biktima kag mahimo napatay bangod sa suffocation.
Padayun naman ang pagpanawagan ni Fajarito sa may mga himata nga namissing nga makig-angot sa Bacolod Police Station 10 agud ila nga mahatagan sang impormasyon nga makabulig sa pag-identify sang mga biktima.
Sa pihak nga bahin nakadepende naman sa pamilya sang mga kabataan nga namissing sa La Castellana kun sila ang magarequest sang DNA test.
