Duha ka mga Barangay sa ciudad sang San Carlos City, Negros Occidental ang naapektuhan sang madamol nga pag-ulan kahapon sang kaagahon, Pebrero 23.
Sa interview sang Bombo Radyo Bacolod kay San Carlos City Disaster Risk Reduction Management Office Head Joe Recalex Alingasa Jr., mga alas 5:40 ang takna sang aga gulpiyada lamang nag-overflow ang Palampas River sa Villarante, Purok Tindalo bahin sang Barangay 1.
Suno kay Alingasa, ang rason sang pagbaha amo ang makusog nga pagbaha amo ang makasarangan tubtob mabaskog nga pag-ulan humalin sang alas 2:00 ang takna sang kaagahon sa nabukid nga bahin sang ciudad.
Suno diri ang Barangay 1 ang nahamtang sa Coastline sang ciudad gani isa pa sa nagpabaha amo ang high tide.
May yara sang 45 ka balay ang ginbaha apang naghubas man ang tubig sang nag-untat ang ulan.
May nag-evacuate man nga pito ka pamilya apang sang nag-adlaw na sila ang nakapauli naman gilayon.
Samtang ang Barangay 5 ang ginbaha man bangud nag-awas man ang creek bangud man sa pag-inulan kun sa diin may yara sang 28 ka balay nga nabahaan.
Ang mga nag-evacuate ang nagpauli naman matapos nga magsubside ang tubig kag City Social Welfare and Development Office sang San Carlos ang nakahatag naman sang bulig sa mga apektado sang baha.
May isa man ka recorded nga naguba nga balay bangud sa landslide ukon pagtiphag sang duta nga nagluntad sa Eco-transient highway sa Sitio Camandangan pasaka sa Barangay Rizal, San Carlos City.
Suno kay Alingasa ang pamilya nga nagapuyo sa nasambit nga balay ang safe nga nadala sa evacuation center kag wala man sang nasamaran.
Natapos naman ang clearing operation sang ciudad sa lugar nga ginluntaran sang landslide.
Ang ciudad sang San Carlos sa probinsya sang Negros Occidental ang nagapatigayon sa river deepening kag paglimpyo sang mga water ways agud nga masolusyunan ang pagbaha sa ciudad.
