Partially-burned ang duha ka residential-commercial buildings sa nagluntad nga sunog sa Galo St., Barangay 20, Bacolod City kaina sang aga.
Sa interview sang Bombo Radyo Bacolod kay Bacolod City Fire Marshal Fire Chief Insp. Publio “Buboy” Ploteña, ginpahayag sini nga mga pasado alas-9:00 kaina sang aga sang nagsugod ang kalayo sa naibabaw nga bahin sang isa sa mga building kun sa diin may naga-renta diri nga mga persona tubtob nga naglapta ini sa pihak nga building.
Suno kay Ploteña wala naman nahalitan ang mga commercial establishments sa idalom nga bahin sang duha ka mga building.
Suno sa iya wala man sang may napilasan sa amo nga insidente.
Dugang pa ni Ploteña nga padayon pa nila nga gina-imbestigaran ang ginhalinan sang kalayo kag kun pila ang nangin halit sini.
