Desidido nga magpasaka sang kaso ang duha ka call center agents nga babayi sa Barangay Granada, Bacolod City, matapos nga makit-an ang gin-install nga recording device sang ila boardmate nga lalaki sa sulod sang CR kag kwarto.
Sa interview sang Bombo Radyo Bacolod kay Police Major Joery Puerto, station commander sa Bacolod Police Station 5, ang mga biktima ang naga-edad 28 kag 29 anyos.
Nakita lamang sang duha ka biktima ang recording device sang ini ang mahulog sa CR, kun sa diin sang ila nga gin-install sa ila nga laptop, didto na nakit-an ang 42 ka mga videos nga kuha humalin pa sang bulan sang Oktobre.
Ang mga videos ang nagapakita sang tion nga sila ang nagagamit sang banyo kasubong man sa ila nga pag-ilis sang panapton sa kwarto.
Wala naman nahibaluan kun may-ara na sang mga footages nga una nga naretrieve ang suspetsado kag napasa sa lain nga device.
Ang suspetsado ang ila naman natumod matapos makita sa isa ka video ang nawong sini samtang gina-install sini ang recording device.
Sa ila paghinun-anon sa mga biktima, nagpangayo man gilayon sang pasaylo ang suspetsado nga ginakabig naman nila kuntani nga abyan, apang desidido na ang mga ini nga magpasaka sang kaso.
Ang mga naretrieve nga video footages ang yara naman sa karun sa Women and Children Protection Desk sang Bacolod Police Station 5 kag ginahitso naman ang mga papelis nga kinahanglan sa pagfile sang kaso nga paglapas sa Republic Act 9995 ukon Anti-Photo and Video Voyeurism Act of 2009.
Sa karun, wala pa matumod ang motibo sang biktima sa pagkuha sang mga video footages bangod ang mga suspetsado palang ang nakakomprontar diri, kun sa diin wala man nakahatag eksplinasyon ang suspetsado.
