Duha ka counts sang graft ang gin-file batok kanday Senator Mark kag Camille Villar, utod nga si Paolo, kag ginikanan nga sanday Manuel kag Cynthia, kasubong man sa pila ka mga opisyal sang local water districts sa kapaslawan nga mag-provide sang nagakaigo nga serbisyo sang PrimeWater Infrastructure Corporation nga ginapanag-iyahan sang pamilya Villar.
Ini ang ginkumpirmar sang Office of the Ombudsman kahapon.
Suno kay Assistant Ombudsman Mico Clavano, nakalab-ot sa amo nga konklusyon ang talatapan matapos ang masobra anum ka bulan nga imbestigasyon tuhoy sa mga joint venture agreement sang Primewater sa pila ka mga water district partikular sa mga tinuig 2015 tubtob 2022.
Gin-imbestigaran ang PWIC bangud ini ang may P65.6 million nga wala nabayaran sa tatlo ka water districts kalakip ang Quezon Metro Water District, Trece Martires City Water District, kag San Pedro Laguna Water District.
Ginkonsidera sa imbestigasyon ang report sang Office of the Government Corporate Council (OGCC) kag findings sang Commission on Audit (COA).
Suno kay Clavano, ang mga Villar pa ang beneficial owners sang PrimeWater sa mga katuigan nga sakop sang imbestigasyon.
Ang nasambit nga Joint Venture ang para sa financing, development, rehabilitation, expansion, improvement, operation kag maintenance sang water supply, kasubong man sa septage sang kada lugar.
Abisohan naman ang mga Villar nga mag-file sang counter-affidavits agud sabton ang mga reklamo nga yara na sa karon sa preliminary investigation.
Sang Disyembre 2025, ginbaligya sang Villar Group ang PWIC sa Crystal Bridges Holding Corp. sang Lucio Co Group.
