Nadulaan sang kabuhi ang duha ka mga criminology student matapos nga makabunggo sa nagapundo nga truck ang ila ginasakyan nga motorsiklo sa National Road sang Hacienda Silos, Barangay Talaban, Himamaylan City, Negros Occidental sang Enero 30 sang gab-i.
Ginkilala ang mga biktima nga sanday alyas John, driver sang motorsiklo kag ang backrider amo si alyas Jasper.
Sa interview sang Bombo Radyo Bacolod kay Police Lt Col Mark Anthony Grande, hepe sang Himamaylan City Police Station, ang imbulbado sa aksidente amo ang Isuzu truck nga may karga nga tubo nga nagapundo sa higad sang dalan kag isa ka motorsiklo nga nasakyan sang mga estudyante.
Suno kay Grande, gina-usoy sang motorsiklo ang south to north nga direksyon ukon halin sa Himamaylan City padulong sa banwa sang Binalbagan, apang pag-abot sa lugar sang aksidente, nakabunggo ini sa likod sang nakapark nga truck nga kargado sang tubo.
Bangud sa impact, napatay ang driver sang motorsiklo kasubong man ang backrider.
Wala man nakasuksok sang helmet ang duha kag magapadulong kuntani sa ila nga eskwelahan agud nga magpapirma sang school clearance.
Suno kay Grande, ginapadalian ang school clearance sang duha gani bisan gab-i na, nagbiyahe pa sila.
Ang duha ang third year college na kag nagakuga sang BS Criminology sa Carlos Hilado Memorial State University CHMSU-Binalbagan Campus.
Suno kay Grande, wala nakabutang sang early warning device ang driver sang truck matapos magpundo bangud nabatyagan sini nga may guba ang iya nga salakyan.
Ginkakibot nalang sini nga may naglugapok sa buli sang truck kag madulom ang lugar nga natabuan sang aksidente gani wala matalupangdan ang nagapundo nga truck.
Ginahulat pa sa karun sang mga kapulisan ang disposition sang pamilya apisar nga may inisyal na nga ginhambalan ang duha ka partido.
