Nakilala na ang apat ka mga napatay matapos masunog ang duha ka wing van nga nagbunggu-anay sa Barangay Sagua Banwa, Valladolid, Negros Occidental kaina sang kaagahon.
Ulihi nga na-identify amo sanday Diany Garcia sang Barangay E. Lopez, Silay City, Negros Occidental kag Evel Elostrisimo nga mga empleyado sang Rivson Commercial sa Lizares St., Bacolod City.
Ang sakay naman sang pihak nga wing van amo ang mag-utod nga sanday Wendel kag Carlo Larios, residente sang Mabinay, Negros Oriental nga bag-o lang nakadeliver sang foam kag baby products sa Dumaguete City.
Madumduman nga natabo ang head-on collision sa kurbadahon nga dalan sa Barangay Sagua Banwa mga alas-12:15 sang kaagahon.
Sa interview sang Bombo Radyo Bacolod kay Fire Officer 1 Dustin Dolar, investigator sang Valladolid Fire Station, nagsugod ang kalayo sa wing van nga may karga nga plastic products bangud nga naigo ang gasoline tank sini.
Gilayon man nga nasunog ang nabungguan nga wing van gani nga wala na sila narescue sang mga bombero.
Suno kay Dolar, nakaangkon sang third degree burn ang mga biktima.
Nagdangat naman sa isa ka oras tubtob nga mapalong ang kalayo samtang lima ka oras naman ang retrieval operation sa bangkay sang mga biktima bangud nagpilit ang ila lawas sa cabin sang truck.
Suno sa imbestigador, gin-amat-amat lang nila kuha ang mga bangkay agud indi mautod ang ila nga lawas.
Nagresponde man sa insidente ang BFP sang banwa sang San Enrique, Pulupandan kag ciudad sang Bago.
Nagpanugyan man si Dolar sa publiko nga ipaiway nalang ang pagbiyahe kun nagalain ang pamatyag ukon ginatuyo agud malikawan ang amo nga insidente.
