Arestado ang 31 anyos nga babayi sa drug buybust operation nga ginpatigayon sa Purok Masinadyahon, Brgy 12, Bacolod City, kaina sang kaagahon.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1, natigayon nga nadakop si Joy Santos, alyas ‘Vivian’, wala sang trabaho kag residente sang nasambit nga lugar.
Nakuha sa paghinakop sini ang lima ka heat sealed transparent sachet sang suspected shabu nga nagabug-at sang kapin sa apat ka gramos nga may standard drug price nga P27,200.
Suno kay Bonilla, gindakop man ang bana ni Santos sang tinalikdan nga tuig angot sa illegal nga druga.
Sa karun ginaproseso na ang dokumento sa pagpasaka sang reklamo batok sa arestado. Samtang, arestado man ang 44 anyos nga iloy sa drug buybust operation nga ginpatigayon sa Purok Kawayan, Barangay Banago, ciudad sang Bacolod, sang Biyernes.
Naaresto sang Bacolod Police Station 3 si Christine Pasilan, alyas ‘Cas’, kasado nga may anum ka bata kag wala sang trabaho.
Sa interview sang Bombo Radyo Bacolod kay Police Captain Rondyl Tapang, station commander sang Bacolod Police Station 3, nakuha sa paghinakop ni Pasilan ang siyam ka heat sealed transparent sachet sang suspected shabu nga ginabanta nagabug-at sang 3.45 grams kag nagabalor sang kapin sa P23, 460.
Sa karun yara na sa kustodiya sang Bacolod Police Station 3 si Pasilan nga magapangatubang sang reklamo sa paglapas sang RA 9165 ukon Comprehensive Dangerous Drugs Act of 2002.
